《學校無間道 之 忠義兩難全》
自小就覺得自己行少年事業運…
打從小學一年級，我就當選班長一職，然後我一直連任。
1997年董建華初次被問會否視連任為目標，當時任職 3A 班班長嘅我覺得，有關連任經驗：問我啦！
後來我因為要「札低」邊個同學上堂傾計同報串邊幾位同學上堂傳紙仔，我原本嘅好朋友仔 sss 都和我恩斷義絕了。那時候，我深深明白到，一個手握權力嘅人，在其政治道路上，必定有所犧牲。
班長嘅其中一樣job duty，報串，真是忠義兩難全，一方面又要做好學生，一方面又要收集朋友仔嘅犯罪情報，叫我咁細個就做「無間道」，人格分裂之餘，內心又掙扎得很。到底「報串」呢個 job duty 係邊個咁冇蔭質嘅辦學者諗出來架。
班長呢個心路歷程，做過班長的人才會深深領略到…
謹致以上經歷予想當年做過無間道，而冇哂朋友仔嘅班長sss。
近年，家長會請求老師畀佢地嘅仔女做班長，想搞好仔女份CV… 老老實實，班長同特首一樣，唔係咁好做架姐，做唔到班長嘅朋友仔，不如考慮下行長呀，收下簿，偷睇下其他同學仔嘅功課咪仲輕鬆。
同埋最重要係，一班咁多行，行長嘅入職條件底D 呀嘛，話唔定表現出色，有得升做班長呢！
PS. 學校有無間道, 公司當然都有...講講下, 呀姐又喺我面前飄來飄去巡視業務啦...hahahaha
Search